ກັມມາທິການສຶກສາສົງ

ພາຣະບົດບາດ, ສິດ ແລະ ໜ້າທີ່ ຂອງກັມມາທິການ ສຶກສາສົງ 

        ກັມມາທິການສຶກສາສົງ ມີພາຣະບົດບາດກ່ຽວກັບການສຶກສາ ຂອງພຣະສົງ-ສາມະເນນ, ພໍ່ຂາວ-ແມ່ຂາວ ໃນຂອບເຂດທົ່ວປະເທດ, ແຂວງ, ນະຄອນຫຼວງ, ເມືອງ, ເທດສະບານ, ນະຄອນ ຕາມຂອບເຂດ ຄວາມຮັບຜິດ ຊອບຂອງຕົນ. ສໍາລັບກັມມາທິການສຶກສາສົງ ຂອງສູນກາງອົງການພຸດທະສາ ສະໜາສັມພັນ ແຫ່ງ ສປປ ລາວ ຂຽນເປັນຕົວອັກສອນຫຍໍ້ ວ່າ “ກສສ”, ສ່ວນກັມມາທິການສຶກສາສົງ ຂອງອົງການພຸດທະສາສະໜາ ສັມພັນລາວ ແຂວງ, ນະຄອນຫຼວງ, ເມືອງ, ເທດສະບານ, ນະຄອນຂຽນເປັນຕົວອັກສອນຫຍໍ້ວ່າ “ກສສ”. 

        ກັມມາທິການສຶກສາສົງ ຂອງສູນກາງອົງການພຸດທະສາສະ ໜາສັມພັນ ແຫ່ງ ສປປ ລາວ, ອົງການພຸດທະສາສະ ໜາສັມພັນລາວ ແຂວງ, ນະຄອນຫຼວງ, ເມືອງ, ເທດສະບານ, ນະຄອນ ມີ ສິດ ແລະ ໜ້າທີ່ ຕາມຂອບເຂດຄວາມຮັບຜິດຊອບຂອງຕົນ ດັ່ງນີ້: 

1. ຮັບຜິດຊອບບໍລິຫານລວມ ໃນທຸກວຽກງານຂອງ ກັມມາທິການ; 

2. ຄົ້ນຄວ້າ ແລະ ປັບປຸງ ການສຶກສາສົງ ໂດຍໃຫ້ມີການສຶກສາ ພຣະທັມມະວິນັຍ, ພາສາປາລີ, ສັນສະກຣິດ ອັກສອນທັມ, ວິທະຍາສາດທໍາມະຊາດ, ວິທະຍາສາດສັງຄົມ ແລະ ພາສາ ຕ່າງປະເທດ ໃນການສຶກສາ ສາຍປະຣິຍັດຕິທັມ, ສາຍສາມັນສຶກສາສົງ ແລະ ບັນດິດວິທະຍາ; 

3. ຄົ້ນຄວ້າ ແລະ ປະກອບ ບຸກຄະລາກອນສົງ ເຂົ້າໃນກອງວິຊາ ການຄົ້ນຄວ້າ ແລະ ສ້າງ ຫຼັກສູດ, ຕໍາລາ ພາສາປາລີ, ສັນສະກຣິດ, ອັກສອນທັມ ແບບຮຽນຮູ້ໄດ້ງ່າຍ ລວມທັງ ແບບຮຽນວິຊາອື່ນ ທີ່ຮັບຮູ້ໄດ້ໄວ ແລະ ນໍາໃຊ້ຢ່າງຖືກຕ້ອງ, ແທດເໝາະກັບສະພາບການປ່ຽນແປງໃໝ່ ຂອງໂລກ; 

4. ຈັດຕັ້ງຫ້ອງສະໝຸດ, ຫໍໄຕຣ ໃນແຕ່ລະ ວັດ, ເມືອງ, ເທດສະບານ, ນະຄອນ, ແຂວງ, ນະຄອນຫຼວງ ແລະ ສູນກາງ ອົງການພຸດທະສາສະໜາສັມພັນ ແຫ່ງ ສປປ ລາວ ລວມທັງ ສະຖານການສຶກສາສົງທຸກແຫ່ງ ສໍາລັບສຶກສາຄົ້ນຄວ້າຄວາມຮູ້ໄປພ້ອມກັນກັບການຂະຫຍາຍຕາໜ່າງການສຶກສາ ຢ່າງໜ້ອຍ ແຂວງລະ ໜຶ່ງ ຫາ ສອງ ແຫ່ງ; 

5. ຈັດຕັ້ງໂຮງຮຽນພຸດທະເຍົາວະຊົນ ຂຶ້ນໃນວັດທີ່ມີເງື່ອນໄຂ ໂດຍມີການກໍານົດ ວັນ, ເວລາ ແລະ ວິຊາທາງພຣະພຸດທະສາ ສະໜາ ປະສົມປະສານກັບວິຊາຮັບໃຊ້ສັງຄົມ ແລະ ພາສາ ຕ່າງປະເທດ ໃນການຮຽນການສອນ; 

6. ສ້າງບຸກຄະລາກອນສຶກສາສົງ ໃຫ້ໄດ້ທັງ ປະຣິມານ ແລະ ຄຸນນະພາບ ເພື່ອຮັບໃຊ້ວຽກງານການສຶກສາສົງ; 

7. ສັງລວມ ແລະ ເຕົ້າໂຮມ ບັນດານັກປຣາດ-ບັນດິດ, ນັກວິຊາການ ທາງພຣະພຸດທະສາສະໜາ ເພື່ອດໍາເນີນວຽກງານ ດ້ານວິຊາການ, ພາສາສາດ, ສາສະນະສາດ ແລະ ວິທະຍາສາດ ອື່ນທີ່ກ່ຽວຂ້ອງ; 

8. ຄຸ້ມຄອງ, ຕິດຕາມ ນັກຮຽນ, ນັກສຶກສາສົງ ທີ່ສຶກສາ ທັງພາຍ ໃນ ແລະ ຕ່າງປະເທດ ພ້ອມທັງຮັບຜິດຊອບ ການຄັດເລືອກ ແລະ ສອບເສັງ ນັກສຶກສາສົງທີ່ຈະໄປສຶກສາຕໍ່ຕ່າງປະເທດ; 

9. ຄົ້ນຄວ້າ, ສັບຊ້ອນ, ຈັດສົ່ງ ພຣະສົງ-ສາມະເນນ ທີ່ຮຽນຈົບ ຈາກ ວິທະຍາໄລສົງ ຫຼື ມະຫາວິທະຍາໄລສົງ ທັງພາຍໃນ ແລະ ຕ່າງປະເທດ ໄປປະຈໍາການຢູ່ ແຂວງ, ນະຄອນຫຼວງ, ເມືອງ, ເທດສະບານ, ນະຄອນ.

 

ຄະນະບໍລິຫານງານກັມມາທິການສຶກສາສົງ
ສະໄໝທີ8 ປະກອບດ້ວຍ:

1. ພຣະອາຈານ ມະຫາພູສະຫວັນ ພັນທະບົວລີ
ເປັນຫົວໜ້າກັມມາທິການ 

2. ພຣະອາຈານ ປອ. ພວງປະເສີດ ພູມມາວົງ
ເປັນຮອງຫົວໜ້າກັມມາທິການ 

3. ພຣະອາຈານ ທອງຄໍາ ພົມມະຮັກສາ 
ເປັນຮອງຫົວໜ້າກັມມາທິການ